فـــــــــــــــــــــ باك ــــلاش

ما هي أول كلمة قلتها ؟؟

هههههههه
من اولها يا صافى طب انا هعرف اول كلمها قولتها ازاى




ساعتها كنت صغير قوى عموما هسألك الحاجه
وابقى اقولك


2- شخصيه كرتونيه كنت/ي
تحبه/تحبينها ؟؟










ياااااااااااااه يا صافى تعرفى انى كنت
اموت فى الكرتون ولحد دلوقتى لسه بحب اتفرج عليه وخاصة كان فيه الكابتن ماجد
وجلينديزر ومازنجر وسلاحف النتينجا وكمان القبطان بومبه وطبعا القط والفأر دا
اساسى






3- هل كنت مشاكس .... مشاغب ؟؟





لا والله يا صافى
طول عمرى مسالم ومابحبش المشاكل بس ايه تعرفى مبدأ اتقى شر الحليم اذا غضب



اهوه انا كنت كدا
لما خلاص الشئ يزيد عن حده تلاقى حد تانى اللى ظهر مش محمد يعنى تقدرى تقولى انى
مكنتش ببدأ بالشر برغم انى كنت جسمانيا قوى بس كنت مابأزيش حد الا ماهوه يبدأ
بالشر









4- اذكر موقف طريف من طفولتك





موقف طريف موقف طريف ههههههه
بصى يا ستى هقولك موقف من ابتدائى بس لذيذ كنت مره وانا فى المدرسة كان فيه بنت
زميلتى مضيقانى ومش راضيه تدينى المسطرة فقولتلها لو مش هتجيبى المسطرة هقول
للاستاذ يضربك رفضت برده فطلعت بره الفصل كده وعملت انى رايح للاستاذ ورجعتلها
وقولتلها هاتى المسطرة وروحى كلمى الاستاذ اصل هيضربك فالبنت صدقت وراحتله قالها
ايه اللى خرجك من الفصل قالتله محمد قالى كذا وكذا فصاحبنا جالى بقه وكل شر وقالى
انا قولتلك تبعتهالى وراح يا معلم خبطنى حتة قلم ابن اللذين لسه فاكره لحد دلوقتى
وكل مابشوف الاستاذ ده دلوقتى بكره اهله لانه كان مفترى ههههههه





5- أكثر موقف حصل في طفولتك من
المستحيل أن تنساه









موقف من المستحيل نسيانه
بصراحه كان موقف جماعى من طلاب فصلى كلهم وهوه ا لما كنا فى خامسه ابتدائى كان
عندنا مدرس عربى ربنا يديله الصحه مره وهوه بيشرحلنا وقع على الارض وتعب وكده
والمدرسين روحوه واحنا لما خلصنا المدرسة قولنا لبعضنا لازم نروح نطمن ع الاستاذ
بتاعنا فجمعنا من بعض افتكر كل واحد عشرقروش وجيبناله 2كيلو برتقال وروحناله ولاد
وبنات وعلى فكرة بيته ماكنش فى بلدنا لااا كان فى بلد مجاوره روحناها مشى والله بس
ماتتخيلوش قمة السعادة اللى المدرس كان فيها لما شافنا داخلين عليه وبصراحه احنا
كمان كنا سعيدين قوى لاننا عملنا واجب وشئ احنا حبينه وشايفين انه صح





6- هل ضربت أحد علي وجهه في
طفولتك ؟؟







لا ابدا مافتكرش هوه ممكن
اكون ضربت حد وانا صغير بس على وجهه ما اعتقدشى يعنى .. وبعدين هوه خلاص يعنى جسمه
كله خلص علشان اشوف وشه ههههههه





7- من هو أكثر شخص أحببته ف
طفولتك؟؟ ولماذا؟؟







فى طفولتى اعتقد ان اول
شخص ده هوه اسرتى وعلى رأسهم ست الحبايب امى طبعا اما فى المدرسه كان فيه مدرس كنت
احبه قوى فى ابتدائى كان اسمه الاستاذ محمد كان مدرس علوم وكمان مدرسه اسمها
الابله امال دى كانت بتدينى عربى وحساب يعنى الشخصيات الكويسه مابتتنسيش ابدا





8- كنت بتحب مين أكتر بابا أم
ماما؟؟







هههههههه هما الاتنين طبعا
لانهم والدى ووالدتى بس بصراحة اكتر كنت
اميل لوالدتى بإعتبار بقه ان اخر العنقود ففيه اهتمام اكبر وانتى عارفه ههههههههه





9- كم مرة ضربت في طفولتك ؟؟



من بابا ..







اضربت يعنى ههههه هوه
بصراحه مش فاكر بس اكيد اضربت من والدى لما كنت بعمل حاجه غلط او انى مقصر فى شئ
معين زى مذاكرتى مثلا بس سيبك كنت بعمل اللى فى دماغى بردن هههههههه




من ماما ..



لا والدتى عمرها ماضربتنى ابدا بالعكس كان اى حد يضربى تثور عليه








10- موقف حدث في طفولتك عندما
تتذكره الآن تحزن









لا مافيش





11- هل كنت شخص ذو شخصيه قويه أم
مغلوب عليه؟؟







انا بصراحةطول عمرى ليه شخصية وكيان اينعم وانا صغير كان كل حاجه والدتى
اللى بتختارهالى بس دا بطبيعة الطفل لكن بعد ماكبرت شويه بدأ يبقى ليه اختياراتى
الخاصة يعنى عاوز ده ومش عاوز ده وكان لما
كان يتغصب عليه انى اذاكر كنت برده ادخل واعمل انى بذاكر وماذكرشى



عموما الحمد لله بجد ليه شخصية مستقله ودا مايمنعشى ان والدى ووالدتى اكيد
ليه جزء كبير داخل الشخصية دى ومش معنى الاستقلال فى الشخصية الانفصال عن الاراء
الاخرى خاصة لو من اسرتك .






12- من أكثر شخص أثر في حياتك
الطفولية ؟؟





والله انا اخدت كل معلوماتى وتكوينشخصيتى من حاجات واشخاص كتير يعنى من
الاسرة اخدت فيهم كل حاجه شايف انها حلوة وكمان فى المدرسة نفس الشئ وحتى لما كنت
اخرج العب فى الشارع مع اصحابى برده كنت اخد منهم افضل مافيهم وبرده هذا لايعنى ان
انا نقى من كل شئ لااااا بس ممكن نقول ان الجزء الغير سوى قليل





13- اكبر عيديه جمعته/جمعتيه كم
؟؟ ومن مين





ههههههههههههه ياااااااااااه انا كنت باخد عيدية كير بصراحة بإعتبار انى
اصغر واحد فالكل لازم يدينى وطبعا اخواتى كانوا بشقتوهم فى ثانيه كانوا بيضحكوا
عليه وانا صغير ويبدلوا معايه الجنية منى بربع جنيه منهم هههه وانا كل اللى همى
اهى ورقة جنية ربع مش فارقه بس كنت اخد العيدية واجرى بيها على محل البقالة واجيب
كل اللى انا عاوزه وخاصة الشيبسى لانى كنت احب الشيبسى جدا وكان فى حاجه اسمها
دراكولا وليز برده واكيد الكاراتيه



14- هل عمرك وإنت طفل أحرجت بابا
أو
ماما ببراءتك؟؟ اذكر مواقف؟؟







حصلت مره كان فيه واحد صاحب والدى فى الشغل فكان بينادى على والدى وكان
والدى مش عارف كان مشغول فى ايه فقالى قوله هوه بره وجاى بعد شويه فجرجت قولتله
بيقولك هوه بره وجاى بعد شويه ههههه فطبعا خربت الدنيا ... وانا مالى مش هوه اللى
قالى كده





15- هل تتذكر حاجات كتير من
طفولتك ؟؟ ولماذا؟؟







اكيد انا ايام طفولتى استحالة انساها لانها اجمل اللحظات والاوقات اللى
الواحد عاشها بس طبعا مع ضغط الحياة ممكن بعض الحاجات تقع من ذاكرتك ماتفتكرهاش
الا بموقف مشابه لها .



16- هل تحن لأيام طفولتك؟؟







دا اكيد بس للاسف خلاص جيم اوفر



وزى ماكانت ام كلثوم بتقول عاوزنا نرجع زى زمان قول للزمان ارجع يا زمان
... وطبعا الزمان استحالة يرجع



17- هل تعتبر طفولتك جميلة ؟؟





كل واحد يشوف طفولته اجمل ايام حياته فأعتقد الحتة دى نسبيه من شخص لاخر
فيه اللى مممكن يقيمه انه عاش طفوله جميله وفيه اللى يقول انه بئس فى طفولته .. بس
انا الحمد لله عشت طفوله زى اى طفوله يسودها الحب والضحك واللعب مليئة بالاصدقاء


18- موقف حصل في طفولتك عندما
تتذكره الآن تحس بالإحراج





مافيش ههههه هوه مش احراج احراج يعنى بس كان فيه مره كنا فى ثانوى مشترك
وكان عندنا حصة العاب وانا مكنتش جايب لبس اللعب معايه ومكنتش ناوى العب بس لما
لقيت اللعب حلو روحت مشمر ولاعب فى البنطلون ويروح البطلون عملها فيه ويروح مقطوع
ومن حته محرجه جدا



فطبعا كنت فى نص هدومى اخدت بنطلون ترينج من واحد صاحبى وروحت البيت غيرت
البنطلون ورجعت تانى المدرسة بس كا منظر الواحد يكسف ههههههه



19-من كـان يدلعك أكثر أبوك او
أمك ؟







شور الحاجه طبعا


20- اســم دلعك بالطفوله لحد
الان ينادونك به ؟؟ وماهو ؟؟







لا مكنش فيه ليه اسم محدد بس المفروض ان محمد واحمد دلعه دايما حماده








21- بطفولتك كنت/ي تبكي/ن إذا
ماجلست/ي بالاول بالطابور اوالفصل ؟؟







لا ابدا دا بالعكس دا احنا كنا بنتسارع على اللى يقعد فى اخر دكة ههههه اه
والله علشان نبقى بعاد عن الانظار نعمل اللى احنا عاوزينه ومانبقاش مكشوفين
للاساتذه




22- عمرك تهت ؟؟؟ وعملت إييه
احكي الموقف؟؟
واحكي شعورك كان إيه؟؟







تهت ااااااااااه بس هوه مش بالظبط يعنى ... مره كنا راجعين من عند ناس
قريبنا انا ووالدتى واخواتى وولاد خالى فكنا راكبين القطر وطبعا كنا صغيرين لاقينا
القطر هدى قوى فى مكان مش محطة فروحت انا وبنت خالى نازلين من القطر بنحسب انها
المحطة وفجأة لاقينا القطر بيمشى قعدنا نعيط ونجرى وراه ونادى ونصرخ لما شافونا
اخواتى ووالدتى اخويا نزل وركبنا بس ايه كان موقف جامد ... كنا خلاص قولنا اننا مش
هنشوفهم تانى






23- عندك لعبه موجوده من صغرك
إلى الآن ؟ وماهي ؟؟







لا لعبة مش موجود بس انا بحب دايما أحفظ بكل حاجه قديمة ليه بعتبرها ذكرى
حتى ولو كانت قيمتها قليلة يعنى مثلا انا مازلت بحتفظ بورقة كنت كاتب عليها سورة
الفاتحة واول ايات سورة يس ودى من اولى اعدادى وكمان محتفظ ببعض الرسومات اللى كنت
رسمها وانا صغير دا بخلاف شهادات الدراسة محتفظ بغالبيتها وكمان محتفظ بمناديل كنت
كاتب عليها اغانى لمحمد فؤاد وانا فى ثانوى وكمان اجندات كنت مدون فيها حاجات انا
كتبها يعنى زى شعر وكلام من الهبل اللى انتم عارفينه ده






24- هـل كـنت/ي تـعانـ/ين مـن
اخـطاء فـي مخـارج الحـروف .. (الوح=أروح) عثير= عصير)؟؟







انا نووووووووو ابدا الحمد لله كله تمااااااااااااااااام






25- آكله كنت بتحبها كتير
...وآكله تكرها وسبب الكره ايه ..؟؟







هوه كل الاكل نعمة من عند ربنا بس دا مايمنعشى ان فيه اكله بحبها زى الكشرى
والبطاس الصوابع واكله مش بحبها قوى وهى البطاطس بصلصة





26- ما اسم اول مـدرس/ه درستك
..؟







المدرسة امــــــــــــــال مدرستى فى اولى ابتدائى كانت مدرسة عربى وحساب
ودين اقصد انها تقريبا كانت بتدينا كل حاجه ههههه







27-كيف مستواك الدراسي ممتاز
..ولا كسلان ..ولا نص ونص ..؟؟







لا والله انا الحمد لله طول عمرى كويس ومستقر فى دراستى يعنى مش هقول ممتاز
لا بس يعنى جيد فى ابتدائى كنت التانى او التالت فى فصلى وكمان فى اعدادى كنت فى
العشرة مع عدم التوازن فى الترتيب وكده يعنى



فالمستوى جيد لا فوق وطبعا مش تحت

واخيراً ..ماهو الحلم البريء
..حلم طفولتك ..كنت تتمنى ان يتحقق..!







هههههههه تعرفوا انا كان حلمى وانا صغير اطلع ايه ؟ بجد مش هتصدقوا



كان نفسى اطلع ظابط لانى كنت احب دور الظابط جدا وانا صغير واحنا بنلعب
لعبة عسكر وحراميه انا وصحابى لكن بقه سبحان الله ليس كل مايتمناه الانسان يتحقق .



















فى النهاية .... بقولكم سورى انى صدعتكم بكلامى الكتير ده وبجد انا سعيد
جدا وانا بفتكر معاكم اجمل لحظات حياتى وبجد يا صافى ميرسى اخر حاجه انك ادتينى
الفرصة انى استرجع مع نفسى ومعاكم اللحظات الحلوة دى . ويارب دوام التوفيق ليكم
جميعا







اما بقه عن العضو اللى هيتدبس مكانى هنا فأنا اخترته خلاص



اتفضل يا .....................















































اتفضلى يا شيمو



الملاك الشقى

ايه دا يا جماعه

هى شيماء مادخلتش ليه


لاااااااااااااااااااااااا

دا انا هقاضيكم


لازم تدخلى يا شيمو والا انتى عارفه !!