الطريق الى الكوشة ... ( حيل نسائية )

الموضوع باسم التقل صنعه
واسيبكوا تكملوا قرايه

في الايام الغابرة (الغبرة) وفى احدى خطوباتي السالفة (التالفة) .. ايه ده هم كانوا خطوبات ؟ ايوه يا سيدي (فهم كـُثـــرُ) على رأي ابو فراس الحمداني .. كانوا حكيمات العائلة يقولولي ( التقل صنعة) .. و (خطيبك علي ماتسستميه .. إن هنج رستريه .. وإن ما استحملش الفيستا .. رجعي الاكس بي)
.. ولانه صنعة مش اي كلام ولسوء الحظ فانا لا اجيد فن الشد والجذب وللأسف
اتعامل علي سجيتي ومن ثم فشلت كل الخطوبات السابقة وانا غير أسفة عليها ..
فما شاء الله كان وما لم يشاء لم يكن
فمن واقع تجاربي الفاشلة قولت اقولكم حكمة اليوم وهي التقل صنعة وظبطة ملح مايزيدش شعره

ازاي ؟! اقولكم ازاي :

جواز صالونات والقدر اختارك والمأسوف علي شبابه دق علي بابك .. خليكي
عاقلة وراسية وما تقفشيش في رقبته وتقولي عريس يمَاي لا اهدي كدا واعقلي
وادرسيه وفى قعدة التعارف اسحبي لسانك ال عشرة متر لجوه .. واشتري ولا
تبيعيش .. يعني سيبيه يرغي وانتي ردي علي الاد بكل عقل وحكمة ورزانة وفى
اخر القعدة قوليلهم ادوني مهلة شهر افكر حتى لو كنتي هتموتي عليه وعريس ما تحلميش بيه

زميلك في الشغل و انتص في نظره وجاي يقولك انا معجب بيكي .. برضو اعقلي
واركزي وماتدلقيش من اولها وتقوليله وانا كمان .. لا لا .. بربرشي واذبهلي
واعملي نفسك مرتبكة واقوليله ايه ده انت فاجأتني حتى لو كنتي انتي المخططة لشنكلته وبقالك سنة رايحة جاية تتلزقي فيه

ربنا كرمك واتخطبتي هنا بقي تبدأ البرمجة اللغوية العصبية للمأسوف علي شبابه وده هتلاقيه بالتفصيل في كتاب (المرأة تصنع الرجال والعيال) للمفكرة العظيمة سوسة الفقي

حب البنت تكرفك اكرف البنت تحبك للحكيم تامر حسني .. بصراحة المقولة ديه تنطبق علي الجنسين يا تامر يعني حبي الولد يكرفك اكرفي الولد يحبك .. وزي ما قالوا اجدادنا القط مابيحبش الا خنَاقه
.. فيأسفني ويحز في قلبي ان اعلن ان الجنس البشري جنس نمرود مابيجيش الا
بالتطنيش والكرف لكن اظهار المحبة والمودة والتفاني في الحب والاخلاص
بيجيب نتايج عكسية جدا .. فنصيحتي حبيه ولكن بعقل وماتمحيش شخصيتك وتقضي
علي نفسك علشان واحد في الاخر مش هيعترف بكل تضحياتك ديه ولا هيحس بيها
وهيجري ورا واحدة تديه بالشوز لان زي ما قولنا القط مابيحبش الا خنَاقه

البنت زي طابع البوسطة تتف عليها تلزق اكتر لكن الراجل زي (التفة) يفضل يتلزق في البنت لغاية ما ينشف .. احب اوضح الخطأ العلمي لهذه المقولة لان الطابع بيتلحس مش بيتف عليه وممكن تبلل صوباعك او سفنجة بميه الشرب وتمرره عليه
اما الشق التاني فهو صحيح جدا ولكن في حالة واحدة ان انتي تبقي كرفاه
ومدياله بالشوز في الحالة ديه هيفضل يتلزق لحد ما ينول مراده بعدين هو
اللي هيرميكي وزي ما البـُعدا بيقولوا (البنت زي السيجارة تنباس وتنداس) فلو مش عايزة تنداسي يبقي ايه ؟! (........) بالظبط كدا .

هوي علي الفحم من بعيد لحد ما يولع .. وهدى النار ع الرز واوعي ليشيط
.. كلمات تؤكد ان التقل صنعة ولو زادت النار ع الفحم هيبقي رماد والرز
هيشيط ولو قلت الفحم هيبقي بارد والرز هيبقي ني .. يبقى لازم تتقني الصنعة
وتحترفي الشد والجذب ولا للدلدقة

المأسوف علي شبابه بعتلك ايميل او رسالة فى رجل
حمامة كسيحة .. عرفاكي هتتسرعي وتقرأي الرسالة ماشي هعديهالك اقرأيها
وبعدين خدي نفس عميق وامسكي الرسالة عديها كام سطر وردي بربع عدد الاسطر
اللي في رسالته وافتكري النصيحة السابقة هوي علي الفحم من بعيد لحد ما
يولع لوحده.. وما ترديش في نفس اليوم ليقول عليكي هتموتي عليه لا طنشيه
اسبوع وبعدين ردي عليه

التليفون والموبايل .. اوعى تتصلي بيه ماعندناش بنات بيتصلوا بحد .. خليه
هو يتصل على الموبايل علشان تخربي بيته فواتير و عيشيه في جو الرعب وانك
خايفة مامتك تقفشك و بعدين قوليله ماما جت ماما جت واقفلي فى وشه علشان
يحس بكم المعاناة والتضحية اللي بتقديمها علشان تردي عليه (الكلام ده مع
خطيبك او مع جوزك .. خصوصا جوزك ماتخرجيش معاه الا لما تتصلي بباباكي
تاخدي الاذن .. هيقدرك جدا ويعرف اد ايه انتي متربيه .. وهيبعتك لباباكي
بورقة شكر مزيَـلة بعبارة بنتك طالق .. قبل كدا مافيش كلام خالص في
تليفونات او موبايلات ولا خروجات) و اوعي تردي من اول رنة .. سيبيه يتصل 5
مرات .. وردي عليه بميسد كول (رنة واحدة بس) ولما يكلمك قوليله ما سمعتش
الموبايل علشان كنت سرحانه بفكر فيك .. هينسي حرقة دمه طول النهار ..
وكانك دلقتي جردل ميه علي نار مولعة فهيتش ويبلعها وهو ساكت

عايزة الخطوبة تقصر وصى اهلك يخنقوا عليه .. مافيش خروجات ولا تليفونات ..
انتي بنت من عائلة ومالكيش في السرمحة في االشوارع ولا الرغي في
التليفونات .. هي زيارة اسبوعية في البيت ويجي اخوكي يكبس علي انفاسه ..
وانتي عيشي في دور البريئة وان دول اهلك وانك ما تقدريش تعصيهم ولو عليكي
عايزة تعملي اي حاجة تسعده بس ما باليد حيلة وشوية دموع تماسيحية هتلاقيه
مااستحملش وقالك احنا نقصر ونتجوز ..اما لو من اياهم فهيطفش وده احدفى
وراه قلة وكل سنة وانتم طيبين وعيد سعيد عليكم جميعا

هههههههههههههههههههه
يخرب بيت عقلك يا شوشو
ده احنا لو عملنا كده مش هنروح علي الكوشة ده احنا هنروح علي حارة العوانس ههههههه
بس برضو هجرب النصايح بتاعتك دي
لما نشوف اخرتها
شكلي كده هدعي عليكي يوووووووووووه قصدي هدعيلك
بس بجد موضوع تحفة
تسلم ايدك يا قمر

الملاك الشقي كتب:: هههههههههههههههههههه
يخرب بيت عقلك يا شوشو
ده احنا لو عملنا كده مش هنروح علي الكوشة ده احنا هنروح علي حارة العوانس ههههههه
بس برضو هجرب النصايح بتاعتك دي
لما نشوف اخرتها
شكلي كده هدعي عليكي يوووووووووووه قصدي هدعيلك
بس بجد موضوع تحفة
تسلم ايدك يا قمر

هههههههه لا وحياتك ياختى دة احنا لو عملنا كدة هنروح على ابو زعبل
متقلقيش ياشيماء عيب عليكى
هو انا برضو هجيبلكم خطط اى كلام ولا اية
امشى ورايا وانتى مغمضة ومش هتندمى خاالص ماااالص هههه
( ربنا يستر بقى )

دى يخرب بيتها لو عملت كده انا مستنى القلة من دلوقتى اصلو انتو بتحلموا والله دلوقتى مفيش صبر خلاص العريس هيقول هى ناقصاكى انتى كمان مش كفاية اللى احنا فيه انتى شكلك مش عايشة فى البلد وواخده سيخ فى نفسك بنت مين انتى يعنى محنا عارفين اصل وفصل بعض كويس هتعمليهم علينا؟
وهترجعوا تندموا من تانى وتبعتوله وساعتها بقى هو اللى هيقول انا ممكن ارجع بس بشروط يا تانت ههههههههههههههههه
تسلم ايدك وموضوع بجد جميل بس اوعى تعملى بيه انتى حرة ههههههههه

تانت ههههههه
وبعدين انت اشفهمك انت ف الحيل النسائية
محدش يسمع كلامة يابنات اسمعو كلامى انا دة بيحاول يبوظ الخطط الجهنمية بتاعتنا
يعنى احنا نتعب ونخطط ونتكتك وف الاخر يجى هو يبوظ كل دة
يابنى دى نتائج مضمونة وحاجات متجربة مية مية ولا فراخ الجمعية

هههههههههههههههه

الحيل النساااااااااائية ههههههههههههههه اة على فكرة يااا شيماااااء خليكى ورا شوشو

وانتى هاااتكسبى (((( ع اقرب سجن ع طول ))) دى محضر خير عاايزة تجوزكوا

((( تسجنكوا ))) هههههههههههههههههههه

حيل نسااائية هههههههههههههههه اسمعوا كلالامها علشان تروحوا ابو زعبل ونرتااح منكم

خطط مفقوسة ومعروفة خليكوا خططوا لحد متروحوا ورا الشمس انا بقول اهو باعلى صوتى محدش يسمع كلام شوشو هتوديكوا فى داهية انتوا احرار
وبعدين ممكن اوى العريس يصبر لحد ما يتجوز وبعدين اللى اكله بط بط هيطلعوا عليكى وز وز
ههههههههههههههههههههه

والله يا شوشو كل ده ممكن يتعمل صح بس امته بقا مش إذا اصلا فكر ودخل البيت لم يفكر ويدخل البيت يا ستي ابقي اعملي التعملية.

بس نصيحة مني لوجه الله لبنات لما المنحوس ابن النحوسة والهيطس في نظرة وأكيد هيكون أحول وجالك وفكر يعني واليعاذ بالله وفكر يخطبك عاوزك بقا تتشيكي له وانا اعطيكي مثالين اثنين تختار واحد منهم إما تعملي زي سعاد حسني في فيلم الجواز على الطريقة الحديثة لما كانت بتحب حسن حسني وعبد لامنعم ابارهيم راح يخطبها كانت متشيكة على الاخر ومظبطه المثال التاني وهو قريب وليس علينا ببعيد زي ياسمين عبد العزيز في فيلم حاحا وتفاحة لما كانت مطقمه للواد الاهبل ابن الهبلة الكان رايح يخطبها كانت مزة هايلة عاوزكم تأخذوا دولت مثالين للشياكة وطبعا ديه أقل حاجة عندكم في الشياكة والدلع الهيدلعه المحروس الهيدبس فيكم.

هههههههههههههه
ولا يهمك كلامهم يا شوشو
دول مفروسين من الخطط بتاعتنا
مع انهم ميعرفوش ان احنا لسه لسه ياما عندنا خطط
بس طبعا مش هنقولكم عليها
واحنا معاكي يا شوشو للاخر
لما نشوف اخرتها معاهم

كميله يا شوشو الحيل ده بجد

دول هايشوفوا أيام سوده أن شاء الله

والله ما احنا شيفنها من يوم ما عرفناكم

el_ashek كتب:: هههههههههههههههه

الحيل النساااااااااائية ههههههههههههههه اة على فكرة يااا شيماااااء خليكى ورا شوشو

وانتى هاااتكسبى (((( ع اقرب سجن ع طول ))) دى محضر خير عاايزة تجوزكوا

((( تسجنكوا ))) هههههههههههههههههههه

حيل نسااائية هههههههههههههههه اسمعوا كلالامها علشان تروحوا ابو زعبل ونرتااح منكم

لا وانت الصادق دى هتروح ع بيت العدل
ابو زعبل دى احنا فاتحينها عشانكم ههههه بعد الجواز طبعا
متستعجللللللللللش ياصميدة هههههههه

boswtol كتب:: خطط مفقوسة ومعروفة خليكوا خططوا لحد متروحوا ورا الشمس انا بقول اهو باعلى صوتى محدش يسمع كلام شوشو هتوديكوا فى داهية انتوا احرار
وبعدين ممكن اوى العريس يصبر لحد ما يتجوز وبعدين اللى اكله بط بط هيطلعوا عليكى وز وز
ههههههههههههههههههههه

هههههههههه اية بط بط ووز وز دة
مفيش فرخخ هههههه
وبعدين انتو خايفين كدة لية
هتتجوزو هتتجوزو
شر ولابد منة
كاس ولازم يمر ع الكل يابنى
يالا بقى هى موتة ولا اكتر هههههه
طب والله انتو خسارة فيكم شهر العسل اللى مش بنرضى نعكنن عليكم فية
دة بدل م تحمدو ربنا وتبوسو اديكم

Mahmoud كتب:: والله يا شوشو كل ده ممكن يتعمل صح بس امته بقا مش إذا اصلا فكر ودخل البيت لم يفكر ويدخل البيت يا ستي ابقي اعملي التعملية.

بس نصيحة مني لوجه الله لبنات لما المنحوس ابن النحوسة والهيطس في نظرة وأكيد هيكون أحول وجالك وفكر يعني واليعاذ بالله وفكر يخطبك عاوزك بقا تتشيكي له وانا اعطيكي مثالين اثنين تختار واحد منهم إما تعملي زي سعاد حسني في فيلم الجواز على الطريقة الحديثة لما كانت بتحب حسن حسني وعبد لامنعم ابارهيم راح يخطبها كانت متشيكة على الاخر ومظبطه المثال التاني وهو قريب وليس علينا ببعيد زي ياسمين عبد العزيز في فيلم حاحا وتفاحة لما كانت مطقمه للواد الاهبل ابن الهبلة الكان رايح يخطبها كانت مزة هايلة عاوزكم تأخذوا دولت مثالين للشياكة وطبعا ديه أقل حاجة عندكم في الشياكة والدلع الهيدلعه المحروس الهيدبس فيكم.

اصبــــــــــــــــــــــــــــــــر بس يامحمود
الحاجات دى قدمت دلوقتى
الجديد كلة عندى متقلقش هههههههه
دة انتو هتشوفو البدع
ومتقلقش هتدخلو ان شاء الله وباراديتكم كمان
يعنى مش غصم واقتدار

الملاك الشقي كتب:: هههههههههههههه
ولا يهمك كلامهم يا شوشو
دول مفروسين من الخطط بتاعتنا
مع انهم ميعرفوش ان احنا لسه لسه ياما عندنا خطط
بس طبعا مش هنقولكم عليها
واحنا معاكي يا شوشو للاخر
لما نشوف اخرتها معاهم

هههههههه خليهم يابنتى
هما عايزين يفضلو مخدوعين كدة كتير
براحتكم بقى
المهم احنا ع اتفاقنا يابنات
ومتنسوش توطو ع الرز لا يشيط

bose كتب:: كميله يا شوشو الحيل ده بجد

دول هايشوفوا أيام سوده أن شاء الله

ولســــــــــــــــــــــــــــــــة هههههههههه
استنو علينا بس

» الرساله الثانيه :- الطريق إلى الجنة
» الطريق إلى القلرأن ( حازم شومان )